Partizani humbi me rezultatin minimal 1-0 në transfertën ndaj Astanës, duke lënë për në Elbasan kalimin ose jo në fazën e grupeve të Conference League.
“Të kuqtë” vuajtën shumë presingun e lartë të vendasve në pjesën e parë, teksa për ta bërë edhe më të vështirë, erdhi edhe dëmtimi i Grezdës.
Astana shënoi dy herë në pjesën e parë, por vlejti vetëm njëri prej golave, ai i shënuar në minutën e 41, që vulosi edhe fatin e ndeshjes së parë Play Off.
Në pjesën e dytë u pa në fushë një Partizan ndryshe, teksa protagonist absolut u bë mesfushori Arinaldo Rrapaj, i cili provoi disa herë të gjejë golin e barazimit me goditje nga distanca, por nuk kalibroi si duhet të djathtën.
Ndeshja e kthimit do të luhet të enjten e ardhshme, në “Elbasan Arena”.
