Rrëmbimi i Gazmend Çollakut, mbrëmjen e djeshme në afërsi të Vollgës në Durrës dhe ai i Enver Stafukës, rrëmbyer e zhdukur pa asgjë gjurmë që nga shkurti i vitit të shkuar duken të jenë bërë nga i njëjti grup kriminal.
Së paku në këtë konkluzion paraprak ka mbërritur grupi hetimor, nisur nga të dhënat e mbledhura në vendet e ngjarjes dhe krahasimi i dy pengmarrjeve.
Panorama online në një analizë të ngjarjes kujton se Stafuka, sikundër edhe Çollaku mbrëmë, janë rrëmbyer nga persona të veshur me uniforma policie.
“Mënyra e veprimit nga ana e pengmarrësve, organizimi i marrjes peng, mbajtja e uniformave të policisë, pritja e pengut pas daljes nga lokali dhe më pas tërheqja me dhunë në makinë, të gjitha duken se kanë lidhje mes tyre”- thonë për “Panorama” burime nga grupi hetimor.
Rrëmbimi i Stafukës
Enver Stafuka, personi që vodhi makinën ku udhëtuan vrasësit e komisar Dritan Lamaj u rrëmbye më 8 shkurt të vitit të shkuar. 48-vjeçari nga fshati Larushk i Krujës u akuzua dy vjet më parë për grabitjen e makinës, ku udhëtuan autorët e vrasjes së komisar Dritan Lamajt.
Ngjarja ndodhi në kohën kur 48-vjeçari po kthehej për në banesën e tij. Sipas Policisë, persona të maskuar kanë marrë forcërisht Stafukën dhe, pasi e kanë futur në automjetin e tyre, janë larguar me shpejtësi nga vendi i ngjarjes në drejtim të paditur.
NGJARJA
Enver Stafuka ndodhej në një lokal pranë banesës së tij, ku po ndiqte ndeshjen e futbollit Atletiko Bilbao-Barcelona së bashku me disa të njohur.
Në përfundim të ndeshjes, rreth orës 23:00, Stafuka ka dalë nga lokali dhe është drejtuar për në banesën, e cila ndodhet vetëm pak metra larg. Pasi ka përshkuar një pjesë të rrugës, tre persona të maskuar, të cilët ndodheshin brenda një automjeti të paidentifikuar, e kanë futur forcërisht në makinë dhe janë larguar me shpejtësi në drejtim të paditur.
Disa të njohur të tij kanë lajmëruar policinë, duke thënë se kanë pikasur në distancë rrëmbimin. Forca të Policisë së Krujës mbërritën në vendin e ngjarjes dhe nisën hetimet për zbardhjen e rrëmbimit dhe motivin e autorëve për të mbajtur peng Stafukën, person me precedentë të mëparshëm penalë.
Precedentet
Enver Stafuka është dënuar 4 herë për vepra të ndryshme penale, por ngjarja më e rëndë ku u përfshi emri i tij është ajo e vrasjes së Dritan Lamajt. Babai i 4 fëmijëve u arrestua mbrëmjen e 27 majit 2013 në qytetin e Fushë-Krujës, si bashkëpunëtor i dyshuar në vjedhjen e automjetit, nga i cili u ekzekutua mbrëmjen e 25 shkurtit kryekomisari Dritan Lamaj. Por Gjykata e Shkallës së Parë në Durrës e ka liruar si të pafajshëm për këtë ngjarje Stafukën më 13 nëntor të vitit 2013.
