Një kontrabandist shqiptar është dënuar me 2 vjet e 8 muaj burg pasi kaloi 2 ditë në det duke drejtuar një jaht të mbushur me emigrantë shqiptarë, përfshirë një fëmijë, drejt Britanisë së Madhe.
Eduard Mucaj drejtoi një skaf të mbipopulluar dhe të pajisur keq përtej Detit të Veriut nga Holanda, pavarësisht se nuk kishte pajisje sigurie apo pajisje lundrimi. Skafi mbante më shumë se 3 herë kapacitetin e tij dhe ishte i pajisur me një motor të dëmtuar.
Mucaj, 50 vjeç, u nis nga Den Oever në Holandë në orët e para të 9 gushtit të vitit të kaluar. Ai u gjurmua nga autoritetet holandeze të cilët monitoruan lëvizjen e jahtit ndërsa lundronte në mënyrë të çrregullt drejt Lowestoft, Suffolk.
Roja bregdetare holandeze njoftoi Zyrën e Brendshme kur Mucaj nuk iu përgjigj përpjekjeve të tyre për të kontaktuar me anijen. Skafi u kap 2 ditë më vonë nga një anije patrullimi e Forcave Kufitare teksa hynte në ujërat territoriale të Mbretërisë së Bashkuar.
Oficerët e Forcave Kufitare gjetën emifrantët, duke përfshirë një fëmijë 8-vjeçar, të grumbulluar nën kuvertë.
Asnjë nga personat në bord nuk kishte jelek shpëtimi apo parzmore, përveç Muçajt, i cili u pa në krye me jelek shpëtimi, hidroizolues dhe çizme.
Dy prej emigrantëve të fshehur në varkë kishin marrë më parë urdhra deportimi dhe iu ndalua hyrja në MB. Që atëherë ata janë larguar nga vendi.
Mucaj u arrestua menjëherë për lehtësimin e hyrjes së paligjshme në MB dhe përpjekjes për të mbërritur vetë në MB pa leje të vlefshme hyrjeje.
