Gjigandi amerikan CNN ka përfshirë në lajmet e tij edhe ngjarjen që po ndodh në Greqi ku lakohet emri i një zyrtari shqiptar që dyshohet se ka lidhje me trafikun ndërkombëtar të drogës.
Sipas CNN (seksioni greqisht) personi i shpallur në kërkim nga policia greke K.B. 44 vjeç ka mbrojtje politike në Shqipëri. (Personi K.B. është identifikuar nga opozita shqiptare si Klement Balili).
Duke cituar sërish median greke mësojmë se në pranga për ngarkesat e mëdha të drogës kanë rënë shtetasit, K.A, 52 vjec, G.A, 46 vjec si dhe një shqiptar me incialet D.P. Ky i fundit u kap në Belgjikë, i kërkuar nga Italia. Sipas mediave greke këta të katër janë anëtarët e bandës së fuqishme të drogës që drejtohet nga Balili.
“Në hetimet për goditjen e këtij rrjeti ka bashkëpunuar DEA, struktura policore amerikane e specializuar në luftën kundër drogës dhe ambasada amerikane në Athinë”, shkruan CNN.
Në shkrimin e CNN gjithashtu thuhet se gjatë një takimi mes policisë greke dhe asaj shqiptare kjo e fundit ka thënë se i akuzuari si ‘Baroni’ i drogës, nuk mund të preket sepse ka lidhje me parti politike dhe kontakte me politikanë shumë të lartë në Shqipëri”.
Përgjimet
“Mos u shqetësoni. Në qoftë se ju kapin, unë do t’ju paguaj avokatët. Do të kujdesem për familjet tuaja”. Këto janë bisedat që mendohet se janë bërë nga 44 –vjeçari Balili. Këto përgjime janë botuar nga gazeta Kathimirini.
Dyshohet se 44 vjeçari financonte një parti opozitare greke dhe për këtë bashkëpunonte me krahun e djathtë të tij, një 46vjeçar nga Greqia, drejtues i lartë.
Sipas ‘Kathimerinit’, rrjeti i tij i trafikut shtrihej në Greqi, Belgjikë, Shqipëri, Bullgari, Spanjë, Holandë, Britani, Austri dhe Norvegji.
Droga dërgohej me skafe nga Shqipëria drejt Greqisë dhe më pas prej andej shpërndahej në Europë me kamionë. Fitimet që kjo organizatë merrte nga trafikimi i drogës janë marramendëse, aq sa sipas mediave, mund të shlyenin edhe borxhin e Greqisë.
