Pas Samitit të Berlinit, kryeministri i Kosovës Ramush Haradinaj akuzoi liderët shqiptarë, Thaçi dhe Rama se e lanë vetëm në diskutime, e madje i ushtruan presion për pezullimin e taksës.
Për këtë gjë ka folur sot Hashim Thaçi në studion e emisionit “Opinion”. Presidenti i Kosovës ka thënë se askush nuk i ka bërë presion askujt në Berlin, ndërsa shtoi se e mbështet taksën pasi është propozuar nga kreu i PDK-së, Kadri Veseli.
“Letra e kryeministrit Rama sqaron gjithçka. Askush nuk ka pasur presion nga askush, kemi mbrojtur pozicionin tonë Kushtetues, që vendimi është legjitim dhe madje i vogël në raport me çfarë meriton Serbia. Kemi theksuar domosdoshmërinë që Kosova të fitojë liberalizimin e vizave. Askush nuk ka qenë i vetmuar. Kemi prezantuar opinionet tona, pozicionin kushtetues. Unë e kam mbështetur taksën që nga fillimi. Është një vendim i mrekullueshëm nga propozimi i kryetarit të PDK-së Kadri Veseli për taksën dhe nuk ka dashur të përfitojë vota me këtë gjë. Unë nuk kam pretendim të marr vota në emër të një patriotizmi të rremë”, është shprehur Presidenti i Kosovës./Opinion.al
