Elvis Demçe, i cilësuar si “Zoti i drogës” është dënuar me 18 vite burg me procedurë të shkurtuar në Itali, pas akuzave për trafik droge.
Mediat italiane bëjnë me dije se Ermal Arapaj, një tjetër personazh i botës së krimit është dënuar me 16 vjet.
Dy krerët e organizatave rivale po luftonin për sheshet e trafikut të drogës mes Romës, Acilia dhe Velletri duke përdorur armët e zjarrit, kërcënimet dhe pritat.
Elvisi, i cili është përfolur për lidhje të tij me grupin famëkeq italian Camorra, e kishte etiketuar veten; “Unë jam Zoti”.
Lufta mes dy bandave rivale
Ermali, i njohur si ‘Ufo’, bos i një bande rivale dhe dikur mik i Demçes, duke përfituar nga periudhat e burgosjes të këtij të fundit, tentoi t’i merrte sheshet e trafikut të drogës.
Kjo solli përplasje midis tyre dhe një seri ngjarjesh si: Prita ndaj Ermalit e organizuar nga bashkëpunëtorët e Demçes në korrik 2020 dhe zjarrin në një vile në Arapaj në Velletri më 5 shtator të vitit të kaluar.
Hetimet për të dy shqiptarët u kryen nga prokurori Mario Palazzi dhe Francesco Cascini, ky i fundit ishte në shënjestër të Demçes që kishte vendosur ta vriste.
Por të dy krerët e organizatave kriminale përfunduan në pranga dhe ditën e hënë dolën para organeve të drejtësisë së Kapitolinës për trafik droge.
Ndërkohë, për këto dy organizata kriminale është kërkuar një dënim total prej 120 vitesh burgim.
