Edhe pse gjatë dy-tre viteve të fundit cilësia e plazheve vendase është përmirësuar, duke u lënë më shumë hapësira publike pushuesve dhe duke kufizuar disi sektorin privat, ndotja e ujërave dhe e ambienteve përreth mbetet ende një shqetësim për vizitorët.
Fation Plaku, udhërrëfyes dhe eksplorues, shprehet për gazetarin Drini Zeqo, në Klan News, se përpjekjet e Ministrisë së Turizmit nuk janë ende të mjaftueshme dhe se plehrat në brigjet shqiptare vazhdojnë të jenë të pranishme.
“Ministria ka bërë një punë të mirë për pastrimin e plazheve, por plehrat janë ende aty. Përveç shtetit, edhe sektori privat duhet të ndërmarrë nisma për pastrimin. Personat që ndosin ambientin duhet të gjobiten“, thekson Plaku.
Megjithatë, Shqipëria vazhdon të mbetet një destinacion turistik shumë i dashur. Përveç aktiviteteve në plazh, vendi ynë ofron edhe sporte të ndryshme ujore, ecje malore (hiking), rafting, si dhe promovon kulinarinë vendase në zona si Përmeti apo Dhërmiu.
Lumi Vjosa dhe kanionet e Osumit mbeten dy destinacione të preferuara për rafting.
“Në Vjosë mund të bësh rafting gjatë gjithë vitit, ndërsa Osumi është i aksesueshëm deri në fund të majit”, shprehet eksploruesi.
Për turistët, Shqipëria është ende një destinacion i pëlqyer. Shumica prej tyre e njohin përmes rrjeteve sociale dhe, përveç guidave të organizuara, shumë preferojnë ta eksplorojnë vendin edhe në mënyrë të pavarur./tvklan.al
