Armatime të rënda ushtarake do të vijnë në Shqipëri nga Amerika. Lajmi u dha në faqen ‘Albanian Armed Forces’. Sipas saj, 70 blinda për transport strategjik priten të zbarkojnë këto ditë në Shqipëri nga Ushtria Amerikane. Ndërsa në muajt në vazhdim do vijnë dhe 180 të tjerë. Kjo shifër e çon numrin total të blindave në Shqipëri në rreth 950 copë.
Pas këtij lajmi në rrjetet sociale, Opinion.al u interesua dhe përmes burimeve në Ministrinë e Mbrojtjes mësoi se autoblindat do të vijnë në Shqipëri si pjesë e bashkëpunimit të Shqipërisë me Departamentin Amerikan të Shtetit.
Në ‘Albanian Armed Forces’ thuhej se qeveria shqiptare do të paguajë 15 milionë Euro për to, pasi pjesa tjetër vjen si shpërblim për punën e mirë dhe kontributin e Forcave të Armatosura. “Përveç kësaj Shqipëria ka një kontratë 10 milionë euro me Italinë për furnizimin e ushtrisë shqiptare me rreth 5000 armë duke hequr nga përdorimi kallashnikovët”, thuhet në faqen AAF.
Lidhur me këto shifra, burimet nga Ministria thanë se nuk do të paguhet asnjë qindarkë për mjetet e blindura dhe as për pushket qe do vijnë nga Italia. “Këto donacione vijnë si rezultat i punës së mirë të bërë nga Forcat e Armatosura gjatë 3 viteve të fundit”, thanë burimet zyrtare nga Ministria. Pushkët nga Italia dhe autoblindat nga SHBA, pjesë e marrëveshjes së 2014-ës, pritet të mbërrijnë të gjitha brenda 6-mujorit të parë të këtij viti. /Opinion.al
