Brenda pak ditësh dy policë janë arrestuar pasi kanë kryer aksidente në gjendje të dehur. Rasti më i fundit ishte mbrëmë në Durrës. Shërbimi për Çështjet e Brendshme dhe Ankesat arrestoi në kushtet e flagrancës oficerin e policisë në komisariatin e Durrësit, Ilir Vrioni, 49 vjeç. Siç thuhet në njoftimin zyrtar, Vrioni duke drejtuar mjetin e policisë ka kryer aksident dhe madje ka qëlluar me pistoletë në ajër. Nga testi me aparat drager, Vrioni rezultoi i dehur dhe akuzohet për “Drejtim të mjetit në mënyrë të parregullt.
Ndërsa, ditën e diel më 30 shtator, është arrestuar shefi i stacionit të Patosit, Flamur Veliu. Veliu është përfshirë në një aksident dhe ka përplasur disa makina në zonën e quajtur “Mulliri i artë” në aksin Fier-Lushnje. Report TV ka mësuar se shefi i Komisariatit është arrestuar pasi po drejtonte makinën në gjendje të dehur. Arrestimi është bërë nga SHCBA, dhe në testin e alkoolit ka rezultuar se Veliu ka qenë i dehur. Gjykata vendosi “detyrim paraqitje” për Veliun. Kur doli nga paraburgimi ai mohoi akuzat e SHCBA-së.
Shtimi i rasteve të policëve që bëjnë aksidente në gjendje të dehur dhe për më tepër shkrepin armën çon në mosbesim tek publiku për ata që mbajnë uniformën e policisë së shtetit.
/Opinion.al
