Ligji i Vetingut është kthyer edhe një herë në vemendje të politikës. Partia Demokratike pretendon se Gjykata Kushtetuese ka dërguar në Komisionin e Venecias një draft të gabuar, të papërkthyer mirë.
Sa e vertetë është kjo? Nga Gjykata Kushtetuese askush nuk flet për këtë çështje.
Ndërsa nga selia e PD u tha se”përkthimi zyrtar i dërguar për opinion në Venecia nuk është korrekt”. Kryetari Lulzim Basha, ka theksuar se përkthimi i Kushtetutës dhe ligjit të Vetingut i dërguar nga Gjykata Kushtetuese për opinion në Venecia ka gabime të mëdha dhe nuk është i saktë në dispozitat kryesore.
Ndërkohë në kampin tjetër, atë të majtë, nuk ka reagime zyrtare, por burimet thanë se “Komisioni i Venecias do të shprehet PRO ligjit, ndaj këto janë manovrat e fundit të PD-së për ta bllokuar”.
Mediat raportojnë se Kushtetuesja do të marrë në konsideratë kërkesën e PD-së për ta ridërguar ligjin në Venecia. Kjo procedurë mund të sjellë vonesa, pasi ishte parashikuar që më datë 10 dhjetor do të vinte përgjigja nga ky institucion ndërkombëtar. /Opinion.al
