Të hënën, Ervin Mata do të njihet me masën e sigurisë. Biznesmeni i përfshirë në ngjarjen në Ish-Bllok në tetor të 2018 u vetëdorëzua mbrëmjen e së premtes në policinë e Tiranës pas 4 muajsh në kërkim.
Ai ka dëshmuar se nuk ka lidhje me vrasjen e Fabiol Gaxhës, plagosjen e Ervis Martinajt dhe Elion Hatos.
Duke mohuar se ka shtënë me armë, Mata theksoi se është larguar i frikësuar, duke pretenduar se e kanë sulmuar.
Përsa i përket shkaqeve që çuan në vrasjen e Gaxhës, ai nuk përmend ngacmimin e të fejuarës së tij, këngëtares Elvana Gjata. Ndërsa për pistën e larjes së hesapeve për pazare droge, ai u shpreh se nuk ka konflikte me asnjë.
Të përfshirë në këtë ngjarje, janë edhe Fabiol Alushi, Geldo Hoti, dhe komandoja, Meviol Billo. Ky i fundit i cili dyshohet se ka qëlluar Fabiol Gaxhën, vazhdon të jetë në kërkim./ Opinion.al
