TIRANË- Rrëzimi i helikopterit në ujërat e liqenit të Shkodrës, mesditën e së mërkurës së 6 Prillit vazhdon të mbetet çështja më e diskutuar dhe që kërkon sqarim. Së pari duhet hedhur dritë mbi atë ç’ka ndodhi, pasi dy pilotë humbën jetën në tragjedinë ajrore. Debati nuk është vetëm teknik por është shtrirë edhe në rrafsh politik. Ka qenë ish-Kryeministri Sali Berisha i cili duke u referuar denoncime ka hedhur dyshime mbi misionin e fluturimit të EC 145 në veri të vendit. Janë familjarët e dy pilotëve të ndjerë që kërkojnë të dinë për humbjen tragjike të të afërme të tyre gjatë detyrës. Së treti është opinioni publik që kërkon të dijë shkaqet e rrëzimit të një helikopteri të porsablerë të ushtrisë.
Opinion.al është interesuar edhe mbi rolin që po luan Komandanti i Forcave të Armatosura, Presidenti Bujar Nishani. Ai vetë ka shprehur ngushëllimet e tij për Dëshomrët e Atdheut, pilotët Floran Delia dhe Donald Hoxha. Po përtej kësaj ne kemi mësuar se Nishani është angazhuar dhe ka kërkuar informacion nga Shtabi i Përgjithshëm i Ushtrisë mbi atë ç’ka ndodhi me helikopterin. Mësohet, përmes burimeve se Nishani ka marrë një informacion të cunguar, pra jo të plotë mbi ngjarjen. Sakaq ai sot ka thirrur në Presidencë, kryeprokurorin Adriatik Llalla. Edhe mbi këtë takim nuk ka ende asgjë zyrtare. Ishte një takim pune, tha zëdhënësi edhe asgjë më shumë. Sërish kemi mësuar se është pikërisht aksidenti tragjik i helikopterit, arsyeja e këtij takimi.
Edhe diçka e fundit. Pse janë ngritur tre hetime paralele për këtë ngjarje? Sipas analistit Preç Zogaj, këto hetime paralele kanë krijuar një konfuzion mbi ngjarjen. “Tre hetime paralele kanë ngjallur një garë mes tyre”, tha Zogaj. Aktualisht janë tre palë hetime që po zhvillohen për rrëzimin e helikopterit: Hetimi i prokurorisë, hetimi adminisrativ i Ministrisë së Mbrojtjes dhe investigimi i Bordi të aksidenteve dhe incidenteve ajrore që është i ngritur me vendim Qeveri. Kush do ta zbardhë të vertetën?
/Opinion.al
