PD ndodhet përballë një aksioni të ri opozitar, që sipas paralajmërimeve të kryetarit të saj duket se do të konsistojë në protesta qytetare ndaj qeverisë Rama.
Ndërkohë vetë partia më e madhe në opozitë javët e fundit është e angazhuar dhe në ndryshime të brendshme të saj. Pas zgjedhjes së këshillit të ri kombëtar ku spikatën dhe emra të rinj që angazhohen me PD, radha i erdhi kryesisë e cila u votua të shtunën.
Emrat e propozuar nga kryetari Basha u votuan nga anëtarët e këshillit kombëtar duke përfshirë në kryesinë e re kryesisht emra të rinj e duke lënë jashtë saj dhe deputetë të njohur të PD. Ajo që ra në sy është fitorja e dy të rinjve me votat maksimale të demokratëve.
Burime bëjnë të ditur se Tomor Alizoti ishte më i votuari ndër emrat e kryesisë së re ndërsa e dyta dhe e vetmja femër që hyn në kryesi me vota dhe jo me kuota është Jorida Tabaku. Në fakt nuk është për t’u habitur për këtë zgjedhje pasi si Alizoti dhe Tabaku kanë qenë aktiv në media kohët e fundit me denoncimet dhe qëndrimet e tyre të prera ndaj skandaleve të qeverisë.
Ajo që vlen për t’u përmendur është që demokratët kanë votuar jo vetëm dy emra politikanësh aktivë në qëndrimet e tyre të qarta denoncuese por dhe përfaqësues të shquar të ish të përndjekurve politikë dhe ish pronarëve. Dy kategori që gjithmonë kanë qenë pranë PD por dhe nuk janë vlerësuar ndosha sa duhet.
Ky përfaqësim në kupolën e lartë të PD i ish të përndjekurve nga një prej pinjollëve të familjeve më të njohura antikomuniste dhe që ka kaluar nëpër kalvarin e vuajtjeve të komunizmit, dhe ish pronarëve që prej vitesh enden për të kërkuar të drejtën e pronës, mund të konsiderohet si një rikthim në vlerat e së djathtës shqiptare.
Ekipi i ri drejtues i PD ka përfshirë së fundmi dhe emra të tjerë të rinj si Gazmend Bardhi dhe Ivi Kaso ndërkohë që shumë i votuar në Këshillin Kombëtar ka qenë dhe Sahit Dollapi, aktivist i hershëm i kësaj partie.
Gazmend Bardhi ka qenë prej kohësh i aktivizuar në strukturat e PD por vetëm gjatë muajve të fundit ai është shfaqur aktiv në debate publike dhe televizive duke e rritur ndjeshëm dhe profilin e tij politik./Përgatiti: Desada Metaj
