Ngjarja e fshatit Arapaj të Durrësit, ku dyshohet se disa adoleshente kanë abuzuar me një vajzë 8 vjeçe në ambientet e shkollës, vijon ende të mbulohet me hije dyshimi. Media lokale publikoi lajmi se vajza ishte përdhunuar në datën 5 korrik e se ishte gjetur e lidhur ne katin e katërt të shkollës në Arapaj nga një mësuese.
Mirëpo më pas policia dhe prokuroria e kanë përgënjeshtruar lajmin. Në datën 6 korrik policia në faqen e saj në internet ka publikuar njoftimin, ku thekson se me urdhër të prokurorisë ka ndaluar një 16-vjeçar që dyshohet se ka kryer veprat penale të parashikuara nga nenet 108/a/2 dhe 110/2 të Kodit Penal.
Gjithashtu filloi procedimi penal në gjendje të lirë për një të mitur 13-vjeçar. “Për arsye hetimi nuk mund të bëjmë me dije të dhëna të tjera”, thekson policia.
Vepra penale të këtyre neneve kanë të bëjnë me “Vepra të turpshme” (Kryerja e veprave të turpshme me të mitur që nuk kanë arritur moshën katërmbëdhjetë vjeç, dënohet me burgim gjer në pesë vjet) dhe heqja e paligjshme e lirisë.
Më pas do të reagonte dhe Prokuroria, e cila do të konfirmonte versionin e policisë.“Sipas informacionit që u administrua nga Prokuroria pranë Gjykatës së Shkallës së Parë Durrës, lidhur me rastin që është përhapur në media që ka të bëj me një ngjarje të ndodhur ne Arapaj Durrës, ju informojmë se:Është regjistruar çështja penale Nr.1288 që bën fjalë për veprën penale të parashikuar nga nenet 108/a dhe 110/2 të Kodit Penal. Nuk janë të sakta njoftimet e përhapura në media lidhur me këtë çështje, sipas akteve të administruara nuk ka ndodhur dhe nuk është tentuar të kryhet vepra penale e “Marredhenieve seksuale me të mitur”. Rasti ka të bëjë me persona të mitur të përfshirë në këtë ngjarje dhe për këto arsye bazuar në parashikimet e Kodit të Drejtësisë Penale për të Mitur ju bëjmë me dije se është i ndaluar çdo lloj publikimi lidhur me rastin. Do të kërkojmë mirëkuptimin tuaj për mospublikimin e rastit si arsye e parashikimeve të këtij Kodi. Duke ju falënderuar për vëmendjen!”/ Opinion.al
