Takimi i djeshëm i presidentit Trump dhe mbretëreshës Elizabeth u komentua së tepërmi, e megjithatë nuk ishte shumë e qartë për çfarë folën ata të dy. Sigurisht Donald Trump nuk zhgënjen kurrë dhe guxoi të bëjë publike në një intervistë me Piers Morgan menjëherë pas takimit detajet e bisedës së tij me mbretëreshën. Trump zbuloi se ndër të tjera, ata folën edhe për Brexit.
“Ajo tha se është një problem shumë shumë kompleks, – dhe ka të drejtë, – nuk mendoj se ia kishte idenë njeri sa e ndërlikuar do të ishte… Të gjithë menduan ‘Oh është e thjeshtë, ose rrimë ose dalim, ose shohim ç’do ndodhë..’”
I pyetur nga Morgan nëse mbretëresha i dha ndonjë të dhënë se ç’mendon për divorcin e MB nga BE, Trump ‘e mbajti gojën’:
“Kam dëgjuar nga shumë njerëz që bindshëm thonë se me mbretëreshën nuk hapet kjo temë. Nuk është diçka që duhet bërë.”
Ai shtoi se “mbretëresha është një grua e mrekullueshme… e mprehtë… e bukur, dhe kur them e bukur e kam fjalën brenda dhe jashtë. Është nje grua e bukur.”
Intervista e plotë do të transmetohet të hënën në mëngjes, në Good Morning Britain, ITV./Opinion.al
