Dy aleatët “qejfprishur” duket se nuk e kanë më të lehtë t’i ndajnë gëzimet bashkë. Rama e Meta pritej të uleshin këtë fundviti në të njëjtën tavolinë festive, në mbrëmjen që kishin menduar të kalonin me deputetët e tyre për të kremtuar Krishtlindjen dhe Vitin e Ri.
Lapsi.al publikoi pak ditë më parë e –mailin që i njoftonte deputetët se festa do të zhvillohej me 23 dhjetor, në një rezidencë luksoze, në Vorë.
Por darka është shtyrë për vitin tjetër. Dhe nëse kjo do të jetë shtyrja e fundit, drejtuesit e mazhorancës do të festojnë së bashku më 14 janar.
Spostimi i saj për në mesin e janarit të 2016 –ës nuk është i pari. Disa
e –maile të mëvonshme që u janë shpërndarë të ftuarve tregojnë se data e festës është ndryshuar disa herë.
Fillimisht ishte vendosur data 26 dhjetor. Më pas, një e –mail tjetër i njoftonte të ftuarit, që janë vetëm deputetë të PS e LSI, se festa do të afrohej më 23 dhjetor. Një tjetër e –mail rikonfirmonte 26 dhjetorin dhe deri tani, njoftimi i fundit është ai 14 janarit.
Në ftesë thuhet se përfundimisht është rënë dakord që darka “të bëhet pas vitit të ri dhe të jetë një feste fillim-viti”.
E gjithë kjo justifikohet me faktin se Rama e Meta kanë axhendë të ngjeshur.
Por Rama e Meta janë parë gjithnjë e më rrallë bashkë këto kohë. Ata janë ftohur në marrëdhënie prej zgjedhjevë të qershorit, pasi akuzuan sa drejpërdrejtë aq edhe me finesë njëri – tjetrin për dëmtim të kandidatëve respektivë në zgjedhje.
Ftohja kulmoi me aferën CEZ. I ndjerë i sulmuar pas shpine nga aleati, Meta la të kuptohej se ai ishte gati të shkonte në zgjedhje të parakoshme dhe se do të ishte parti fituese, përballë një opozite të mundshme Rama – Basha.
Kjo atmosferë duket se vazhdon të mbizotërojë në dy partitë aleate në qeveri dhe po vazhdon t’i mbajë larg dy autorët e aleancës së 1 prillit që i solli në pushtet me betimin se, me harmoninë e rigjetur, do të qëndronin gjatë në pushtet, si pjesë e një bashkimi natyral të dy forcave të majta.
Por fryma e hareshme e pranverës që i ribashkoi është zbehur nën mërinë e dimrit të tretë që i gjen bashkë.
Një dimër i trazuar, që siç shihet, nuk është koha e përshtatshme për të ndarë gëzimet. /Lapsi.al
