Shtëpia e Bardhë deklaroi se presidenti Donald Trump i shprehu ngushëllime presidentit francez Emmanuel Macron për zjarrin në katedralen e famshme Notre-Dame dhe ofroi ndihmën e SHBA për restaurimin e saj, gjatë një telefonate të martën.
“Notre Dame do të vazhdojë të shërbejë si simbol i Francës, duke përfshirë lirinë e fesë dhe demokracinë e saj. Ne kujtojmë me mirënjohje në zemër këmbanat e Notre Dame që ranë në 12 shtator 2001, si kujtesë solemne për sulmet tragjike të 11 shtatorit në tokën amerikane. Këmbanat do të tingëllojnë përsëri,” tha zëdhënësja e Shtëpisë së Bardhë Sarah Sanders.
Presidenti Macron ka premtuar rindërtimin e katedrales, e cila konsiderohet ndër ikonat e arkitekturës gotike europiane dhe vizitohet çdo vit nga më shumë se 13 milionë njerëz nga e gjithë bota./Opinion.al
