Një ditë më parë në redaksite e pothuaj të gjithë portaleve ka mbërritur një letër e Pilo Kerrit, emri i të cilit u përfshi në skandalin e tenderave të fituar në konflikt të hapur interesi pasi i biri i tij punon si shef kabineti i ministrit Haxhinasto. Në këtë letër mbushur me cv e të birit dhe pa asnjë përgjigje lidhur me tenderat apo më keq akoma, me përfshirjen e drejtpërdrejtë në aksidentin fatkeq ky humbën jetën 2 femijë, zoti Pilo Keri na sqaronte se i biri kishte punuar vetëm për një vit si shef kabineti pasi ai kishtë fituar pozicionin e drejtorit të projekteve. Në fakt nje “vend pëllumbash” për të zgjatur zinxhirin e 21 tenderave të fituar vetëm në vitin 2015.
Por burime te Opinion.al mësuan se zoti Krislen Keri jo vetëm ka mbajtur postin e drejtorit të Projekteve që nga shtatori i kaluar, por në të njëjtën kohë ka kryer dhe detyrën e shefit të kabinetit.
Ne disponojmë edhe letrën e firmosur vetëm pardje nga Haxhinasto, me anë të së cilës Krislen Keri zhvendoset siç e kërkon ligji në detyrën e re.
Vetëm me një kërkim të thjeshtë rezulton se zoti Keri (i biri) ka qenë prezent në komisionet parlamentare si drejtor i kabinetit të ministrit.
Ne e kuptojmë që Keri (i ati) detyrohet të gënjejë pasi pas të birit fshihen gjurmët e tenderave dhe urdhrave të dhënë atyre vartësve që sot janë ende ne burg. Pyetja që ngremë ne këtë rast është pse ka nxituar Haxhinasto ta largojë nga paradhoma kanakarin e tij pasi një pjesë e shtypit botoi skandalin e përfshirjes së familjes Keri në disa tendera me konflikt të hapur interesi?
Çfarë e ka shtyrë mininstrin Haxhinasto ta bëjë me nxitim këtë akt që duhet ta kishte bërë kohë më parë?
Për sa kohë asnjë titullar i lartë i ministrisë nuk përgjigjet çdokush ka të drejtë të mendojë se pas kësaj familjeje me shumë fat, që ka dhjetra tendera të fituar, dhe familjarë me poste te privilegjuara nga shefa kabineti tek drejtorë prokurimesh, qëndrojne peshq më të mëdhenj.
Që të frikësuar se mos kjo ngjarje merr përmasa me të mëdha po bëjnë lëvizje qesharake për të humbur gjurmët në një skandal që është i qartë si dielli sot. Dhe si leja e zakonshme që Krislen Keri është detyruar të marë për herë të parë pas 3 vitesh përkëdhelje nga eprori. Ndoshta për të reflektuar mbi të gjitha përgjegjësit.
