Presidenca ka lajmëruar sot një konferencë për shtyp sot në orën 11:00. është ndër të rrallat raste kur ky institucion prish ditën e pushimit për të komunikuar me publikun. Kujtojmë se hera e fundit ishte dy muaj më parë kur Nishani lajmëroi se do ta dekretojë Xhafën ministër edhe pse kishte patur reagime dhe akuza publike për të shkuarën e tij si hetues i komunizmit.
Po sot çfarë do të na thotë Nishani?
Në njoftim thuhet: Ju njoftojme se sot dt. 21 maj 2017, ora 11:00, do te kete nje Deklarate per shtyp te Institucionit te Presidentit te Republikes”.
Konferenca që siç kuptohet nga njoftimi nuk do të jetë nga Presidenti Nishani, por nga një prej vartësve të tij dhe vjen një ditë përpara se kryeministri Rama të dërgojë në Presidencë emrat e ministrave që do të shkarkohen dhe 6 ‘teknikët’ që do të propozojë Partia Demokratike.
Sakaq, Kuvendi i Shqipërisë do të mblidhet të hënën pasdite, në orën 18:00 me axhendë të paracaktuar dekretimin e ministrave të rinj, propozime të Partisë Demokratike, një ndryshim ligjor për financimin e partive dhe ç’është më e rëndësishmja, votimin e ngritjes së Komisioneve parlamentare për “Vetting”-un.
