Sot është padyshim shumë e rëndësishme të konsumojmë sa më shumë produkte shqiptare në momentin që përzgjedhim të ulemi në një restorant .
Kjo pasi në shumë restorante dhe hotele ka një prezencë të madhe të prodhimeve të huaja.
A ja vlen të mënjanojmë prodhimin tonë për një të huaj, vetëm për faktin që vjen nga jashtë!? Absolutisht, jo !
Pikërisht këtu fillon strategjia e menaxhimit të suksesshëm të një aktiviteti hoteleri- turizëm. Pra strategjia e blerjes e lëndës së parë është kryesorja. Pastaj duhet të fillojmë nga historia gastronomike e zonës ku ndodhet lokali, aty është baza dhe aty bazohet e gjithë menuja. Krijimi i një identiteti është shumë i rëndësishëm.
Sot ka shumë varietete gastronomike në Shqipërinë tonë të vogël. Por është pikërisht ky nënvlerësim që kemi treguar gjatë gjithë këtyre viteve që na ka penguar ta njohim e ta zhvillojmë atë.
Një lokal që të funksionojë, në të vërtet duhet të investohet shumë tek forca punëtore. Klienti nuk duhet të zhvatet .
Duhet të investoni tek shefi i kuzhinës, ku në kuzhinë mos të qëndrojë një shtëpiake që thjesht bën disa gjëra të skuqura në kuzhinë dhe asgjë tjetër. Puna e kuzhinierit është shumë serioze nuk mund të çohet përpara me njerëz pa eksperiencë të cilët maksimumi që mund të bëjnë në kuzhinë, mund të jetë larja e perimeve.
Jo, këtu gabojmë. Fakti që një grua gatuan mirë në shtëpi, nuk do të thotë që këtë gjë mund ta bëj po kaq mirë edhe në restorant. Ka një ndryshim shumë të madh dhe kjo duhet të kuptohet njëherë e mirë.
Kamerieri është çelësi i suksesit të një restoranti, është ai që ka rolin kryesor ta bëjë klientin të ndihet si në shtëpinë e tij. Ai duhet të jetë një njohës i mirë i ushqimit dhe i të gjithë llojeve të pijeve.
Nuk mund të lëmë jashtë përgjegjësive pronaret e lokaleve, të cilët në shumicën e rasteve kanë shumë huqe të këqija. Një pronar lokali që ka huqe nuk do t’i funksionojë asnjëherë kompania që ka, por thjesht,pritet që shumë shpejt lokali i tij të falimentojë.
