Presidenti Meta në fjalën e tij para mediave ditën e sotme tha për herë të parë publikisht se një grup i strukturuar, që ai e titulloi PPPd, po vepron me provokime dhe sipas parimeve të “Deep state” kundër interesave të shtetit shqiptar.
“Prej kohësh i kam bërë të qartë zotit Basha, zonjës Kryemadhi dhe mikut tim, Doktorit. Të jenë të kujdesshëm të mos bien pre e provokimeve të një grupi të strukturuar PPPd. Është një grup i strukturuar që punon sipas parimeve të “Deep state” që kanë gjetur edhe njeriun e duhur për këtë çështje, i cili nuk vjen në takime me Presidentin, por lahet në pishinë, edhe pse Presidenti i ka treguar për muaj të tërë rrugën e zgjidhjes, e cila nuk është “Rama ik”, por “Rama reflekto”. Kjo ishte deri të shtunën. Tani kam një agjendë tjetër, “Edi thellohu”. Në rast se ti nuk je i pavarur të marrësh vendimet e tua në interes të vendit tënd, unë dhe gjithë shqiptarët e ndershëm që kanë ende gjak shqiptari, do ta mbrojmë Shqipërinë nga të gjitha ata miliarder që duan të kapin Shqipërinë” tha Meta.
Por çfarë është “Deep state” që i referohet presidenti. Në literaturën politike të demokracisë ai konsiderohet si një nga rreziqet ndaj shteteve demokratike në kuptimin që dëmton parimin e përfaqësimit dhe krijon që pakicë me shumë pushtet.
Sipas fjalorit të “Oxford”, “Deep state” do të thotë “një grup njerëzish, kryesisht pjesëtarë me ndikim brenda agjencive qeveritare dhe ushtrisë, që besohet se përfshihen në manipulim të fshehtë ose kontroll të politikave qeveritare”.
Po sipas fjalorit të “Oxford”, termi është një përkthim nga turqishtja i “derin devlet”, përdorur fillimisht në vitet 1990.
Sipas disa studiuesve, koncepti bazohet edhe në shembuj më të hershëm. Një prej tyre është praktika e Mustafa Kemal Atatürk në Turqinë e viteve 1920, kur ai ngriti një rrjetin e tij sekret brenda shtetit.
Shembulli i “deep state”, ose “shtetit brenda shtetit” është konsideruar institucioni i Kishës në Europën e shekullit të XVII dhe XVIII, kur diskutohej ndarja e saj nga shteti. Historianët kanë përshkruar gjithashtu si rast të “deep state” grupe individësh dhe agjensishë brenda Bashkimit Sovjetik dhe shteteve që u shkëputën nga Federata pas rënies së saj.
Në Shtetet e Bashkuara të Amerikës, “Deep State” është një term i përdorur për të përshkruar përplasjet dhe nepotizmin që ekziston brenda një sistemi politik. Termi është përdorur edhe për të përshkruar “një shoqatë hibride të përbërë nga elementë të Qeverisë dhe pjesëtarë të nivelit më të lartë nga bota e industrisë dhe financave që arrijnë të drejtojnë Shtetet e Bashkuara pa u bazuar te vendimi që kanë marrë njerëzit për t’u qeverisur përmes sistemit të tyre politik”. Rasti tipik i kësaj praktike janë vitet e presidencës së George W Bush, kur zëvendësi i tij Dick Cheney arriti të krijonte një qeveri brenda qeverisë për të influencuar vendimet e Presidentit, Senatit, Kongresit dhe Pentagonit.
Më së fundmi, pjesëtarë të administratës së Donald Trump kanë akuzuar CIA-n për përpjekje për të penguar Qeverinë në përmbushjen e synimeve politike.
Regjimi i Maduros në Venezuelë përshkruhet nga studiuesit se mbahet në këmbë nga një organizatë e quajtur “Karteli i Diejve” e cila përbëhet nga zyrtarë të lartë brenda qeverisë së vendit.
Në Itali , rasti më i famshëm i “deep state” është ai i “Propaganda Due”, një lozhë masonike e themeluar në vitin 1877. Në periudhën e drejtuar nga sipërmarrësi Licio Gelli, në vitet 1970 devijoi nga statutet e Masonerisë dhe ndërmori nisma subversive kundër qeverisë dhe rendit në Itali. /Opinion.al
