Santiago Malko mbeti i vrarë mbrëmjen e së martës nga një breshëri plumbash në rrugën “Xhanfise Keko” teksa ai ishte brenda makinës së tij. Malko ka qenë ish-punonjës i patrullës së përgjithshme të policisë. Ai ka qenë i pranishëm në ngjarjen e 4 tetorit në zonën e ish-bllokit ku mbeti i vrarë një person dhe mbetën të plagosur dy të tjerë. Pas kësaj ngjarjeje 26-vjeçari Santiago Malko u shpall në kërkim e më pas u ndalua pasi dyshohej mos ishte i përfshirë në konfliktin e mikut të tij Ervis Martinaj. Por pas qetësimit të situatës, Malko u vetëdorëzua në polici dhe sqaroi rolin e tij në këtë ngjarje.
Në vitin 2016, Malko ka pasur një konflikt me vëllezërit Edmond dhe Gentian Lashi, përkatësisht 34 dhe 26 vjeç. Ky konflikt dyshohet të ketë ndodhur për shkak të një borxhi që vëllezërit Lashi i kishin Malkos. Të dyja palët kanë patur në pronësi lokale bastesh sportive në të njëjtën zonë. Sipas Policisë konflikti ka ndodhur në ambientet e lokalit të Edmond Lashit, ndërsa dyshohet se vëllezërit i kanë pasur borxh prej më shumë se 1 mijë euro ish-policit. /Opinion.al
