Kryeministri në detyrëi Kosovës, Albin Kurti përmes një postimi në rrjetin social Facebook, ka thënë se udhëtimi i presidentit Thaçi “pa protokoll e në kundërshtim me masat e marra ndaj pandemisë COVID-19, është shembull i keq që qytetarët nuk bën ta ndjekin”.
“Presidenti i Kosovës, Thaçi, duhet të pushojë me këto kalime kufiri pa protokoll e në kundërshtim me masat e marra ndaj pandemisë COVID-19. Ai është shembull i keq që qytetarët nuk bën ta ndjekin. Sa për sharjet e fyerjet që m’i bën, duke thirrur me zërin që i dridhet porsi kalama nëpër studiot televizive, e kam zgjidhjen: le ta organizojmë një debat televiziv ku dalim ne të dy, pra, unë Kryeministri në detyrë dhe ai Presidenti jashtë detyrës. Nëse don, le ta marrë me vete edhe Behgjet Pacollin. Në atë rast, po, edhe unë po e marr Xhelal Sveçlën e Rashit Qalajn”, ka shkruar Kurti.
Këto deklarata vijnë pasi Presidenti i Kosovës, Hashim Thaçi, i cilësoi shpifje dhe kërcënim për njerëzit e politikës deklaratat e ministrit të Brendshëm në detyrë në Kosovë, Xhelal Sveçla, lidhur me debatet që nxiti kërkesa e kryetarit të Aleancës Kosova e Re, Behgjet Pacolli për t’u kthyer në Kosovë në kohën e kufizimeve për shkak të koronavirusit.
Më herët, Sveçla në një konferencë për media ngriti dyshime nëse presidenti Thaçi gjatë udhëtimit në Shqipëri ka takuar deputetin Behgjet Pacolli.
“Mbrëmë vonë jam informuar nga ana e policisë kufitare që presidenti i Kosovës, Hashim Thaçi ka kaluar kufirin shtetëror pak para orës 18:00 në drejtim të Shqipërisë. I njëjti është kthyer në Kosovë, pak pas orës 19:00, kur eskorta e presidentit është ndaluar është konstatuar se në veturën e dytë ndodhet presidenti”, ka thënë Sfeçla.
Ai tha që nëse konfirmohet se deputeti Pacolli ishte në veturë me presidentin Thaçi, atëherë edhe Presidenti duhet t’u nënshtrohet masave të izolimit, apo vetizolimit, sipas vendimit të Qeverisë, ndërkaq ka kërkuar nga deputeti Pacolli të tregojë për vendndodhjen e tij, duke thënë se nëse paraqitet në publik, pa iu nënshtruar masave, atëherë policia do të ndërmarrë veprime ndaj tij.
Presidenti Thaçi tha në një lidhje të drejtpërdrejtë televizive se “prej çlirimit të Kosovës dhe deri dje kur kam dalur dhe hyrë në relacionin Kosovë-Shqipëri në procedurat e njëjta ndërsa për interesimin e Sveçlës dhe Kurtit, si ndërmarrje kriminale që është shndërruar dhe që ju intereson lokacioni im, unë jam në shtëpi”, tha presidenti Thaçi./Opinion.al
