Ministria e Energjitikës ka reaguar në lidhje me akuzat e deputetit të PD-së, Edmond Spaho, se ministri i Energjitikës Damian Gjiknuri ka gënjyer në komisionin hetimor për marrëveshjen e qeverisë Rama me CEZ.
Nëpërmjet një njoftimi për mediat, Ministria e Energjitikës, ka bërë me dije se ministri Gjiknuri është paraqitur për të dytën herë në Komisionin Hetimor për marrëveshjen e zgjidhjes me mirëkuptim të konfliktit me CEZ.
Në njoftim, thuhet se gjatë debateve me deputetët e PD-së, ministri Gjiknuri hodhi poshtë dhe spekulimet e qëllimshme të opozitës duke sqaruar se avokati ka qenë pjesë e procesit dhe ka dhënë mendimin e tij, një pjesë prej të cilave janë reflektuar dhe se memorandumi të cilit i referohej opozita kishte të bënte me shprehjen e vullnetit të palëve për t’u ulur në negociata dhe nuk ka të bëjë me produktin e negociatave.
“Zgjidhja me mirëkuptim e konfliktit ishte një vendim politik i qeverisë nisur nga situata alarmante e sektorit, nevoja për të marrë nën kontroll kompaninë e shpërndarjes, zhbllokimi i paketës së investimeve në sistem dhe vonesat që kishte shkaktuar qeveria e shkuar në përgatitjen e dokumenteve e më keq se kaq mos depozitimi në arbitrazh i një padie ndaj CEZ a.s para se ata ta bënin diçka të tillë”.
Ndërkaq, ministria sqaron, se prokuroria dhe më tej edhe Gjykata e Lartë e ka hetuar plotësisht këtë çështje referuar pretendimeve të Kontrollit të Lartë të Shtetit dhe nuk ka konstatuar asnjë shkelje ligjore apo cenim të interesëave të shtetit shqiptar në zgjidhjen e konfliktit me CEZ.
Pas seancës me ministrin e energjetikës Damian Gjiknuri, kryetari i komisionit hetimor parlamentar për marrëveshjen e qeverisë Rama me CEZ, Edmond Spaho e akuzoi Ministrin e Energjitikës, Damian Gjiknuri se ka gënjyer në deklarimin e tij.
Spaho ka bërë publike 2 letra që ai pretendon se janë pjesë e korespondencës së avokatit ndërkombëtar të kontraktuar nga qeveria për këtë çështje, ku sipas tij, faktohet që deklaratat e ministrit janë të pavërteta.
