Në një konferencë të përbashkët për shtyp, me përfaqësues të avokatisë greke, deputeti demokrat Flamur Noka, është shprehur se në çështjen e kryebashkiakut të zgjedhur të Himarës, Fredi Beleri, kryeministri Rama përdori skenarin e likuidimit politik të kundërshtarit.
“Skenari i përgatitur me aq kujdes ndaj Belerit, kryetarit të zgjedhur me votë nga qytetarët e Himarës, tregon qartësisht, së bashku edhe me zhvillimet e ndodhura nga maji deri tani, që me Edi Ramën dhe regjimin e tij standardi i zgjedhjeve është jo vetëm i rrëzuar, por i vrarë e i pushkatuar. Rama funksionon me dy skenarë. E para asgjësimi i votës së lirë përmes zgjedhjes, shantazhit, krimit të organizuar, përdorimin e administratës apo dhe policisë, si në këtë rast. Kur nuk arrin më gjithë këto mekanizma të devijojë votën e lirë, përdor skenarin e likuidimit politik të kundërshtarit. Kjo është e provuar”.
Sipas deputetit demokrat, dosja Beleri tregon se Rama është gati të bëjë gjithçka për të mbajtur pushtetin me qëllimin për të fshehur atë ç’ka është bërë me pronat dhe pronarët e bregdetit.
“Dosja Beleri tregon se Rama është gati të bëjë gjithçka për të mbajtur një pushtet, me një qëllim, të fshehë batërdinë që ai dhe qeveria e tij kanë bërë me pronat dhe pronarët e bregdetit. Beleri, do të ulej në atë karrige dhe do zbulonte zullumim e Ramës e qeverisë së tij me pronat në bregdet. Ky ishte i vetmi faj i Belerit, për të cilin ai duhet të paguajë haraçin me burg”.
Noka gjithashtu deklaroi se kryeministri Rama ka kapur drejtësinë.
“Në Shqipëri Edi Rama ka kapur drejtësinë. Ajo që pritën shqiptarët, drejtësinë e re, po rezulton që edhe në rastin Beleri, por edhe në raste të tjera, pasi edhe lideri Sali Berisha është i arrestuar nga drejtësia e re, pa provë, pa fakt dhe pa akuzë. Është rast unik, por kjo është drejtësia e Edi Ramës. Ju kujtoj që drejtësia e Edi Ramës ka mbyllur sytë përballë korrupsionit madhor dhe krimit të organizuar, për t’u përdorur si hanxhar në duart e tij. Përmenda z. Berisha, por është edhe Ilir Meta me bashkëshorten, është Mediu. Është një drejtësi me regji”.
