Gazeta greke “Kathimerini” ka shkruar sot për Samitin e BE me vendet e Ballkanit Perëndimor, ku ndalet edhe tek Shqipëria, për të cilën thotë se ka një “mesazh të ri nga Greqia”.
Në artikull thuhet se zhvillimet për anëtarësimin në BE lidhen drejtpërdrejt me çështjen e Fredi Belerit, veçanërisht pas rrëzimit të hënën të kërkesës së tij për tu betuar si kryetar i bashkisë së Himarrës.
Athina kishte paralajmëruar me kohë se çdo devijim nga kushtet shumë të qarta që ishin vendosur dhe lidhur me respektimin e shtetit ligjor do të kishte pasoja.
“Në fund të fundit, Greqia ka dorëzuar tashmë një deklaratë me shkrim, e cila shoqëronte letrën e Këshillit Europian për hapjen e negociatave për Shqipërinë dhe që vendoste si tre kushte bazë për promovimin e perspektivës së anëtarësimit të Tiranës, betimin e Fredi Belerit, gjykimin e drejtë dhe respektimin e tij për prezumimin e pafajësisë”, thuhet në artikullin e gazetës greke.
Në këtë kapitull specifik ka referenca për paragrafë të veçantë për shtetet e tjera kandidate (Ukraina, Moldavia, Gjeorgjia, Bosnje-Hercegovina, Maqedonia e Veriut), ndërsa ai që ka të bëjë me Shqipërinë aktualisht mungon. Referenca për Maqedoninë e Veriut është veçanërisht interesante, në një kohë kur ajo e Shqipërisë mungon, pasi kandidaturat e dy vendeve konsiderohen të lidhura.
Në një moment të caktuar, Athina i kishte propozuar Komisionit Evropian që, nëse dëshironte, mund të jepte edhe pëlqimin për shkëputjen e dy kandidaturave, pasi Greqia nuk ka asnjë problem me Maqedoninë e Veriut, e cila sipas saj duket se përmbush kriteret.
“Është absolutisht e qartë se ky zhvillim krijon një front për Athinën, pasi disa vende të BE-së (por edhe SHBA) e konsiderojnë progresin e Shqipërisë si një “histori suksesi”. Dihet mbështetja shumë e rëndësishme e Shqipërisë nga Gjermania, ndërsa presidenca spanjolle e BE-së duket se ka premtuar në Tiranë se problemet me Greqinë do të kapërcehen. Kjo masë – e shprehur në mënyra të ndryshme për Tiranën – mbështetje nga aktorët kryesorë perëndimorë duket se ka pasur një efekt vendimtar në vetëbesimin e kryeministrit shqiptar Edi Rama dhe besimin se Athina përfundimisht do të përkulet për shkak të presionit nga Uashingtoni, Berlini dhe Brukseli. Nga Athina, megjithatë, kujtojnë se procesi i anëtarësimit për çdo anëtar të mundshëm është transnacional”-thuhet në artikull.
