Deputeti i Partisë Demokratike, Gazment Bardhi ka zbardhur për mediat se çfarë u diskutua në mbledhjen e Grupit Parlamentar të PD.
Siç bëri të ditur kreu i Grupit Parlamentar të PD-së, pjesa e deputetëve që ai drejton kërkon nga Parlamenti që të mbahet një interpelancë me kryeministrin për çështjen “Ahmetaj”.
Bardhi theksoi se opozita nuk do të pranojë asnjë të deleguar nga kryeministri. Po ashtu, ai i kujtoi kryeparlamentares Lindita Nikolla, kërkesën për mocion me debat po për çështjen e inceneratorëve.
“Grupi parlamentar i PD-së ka gjykuar se duhet të japë llogari kryeministri Rama për aferën e inceneratorëve. Kryeministri duhet të jetë prezent në seancën e së enjten për të diskutuar këtë kërkesë së grupit parlamentar të PD. Gjithashtu ka një kërkesë nga disa deputetë të opozitës për të zhvilluar një mocion me debat me kryeministrin lidhur me aferën e inceneratorëve. Kërkesa për interpelancë është drejtuar drejt Ramës dhe është detyrimi i tij për të zhvilluar interpelancë. Ajo aferë është aferë personale e tij dhe është Edi Rama që ka fuqinë për të vënë në lëvizje mekanizimin. Kërkesa jonë është për prezencë të kryeministrit. Nuk do të lejojmë intepelancë me një person të deleguar nga Rama, kërkojmë prezencë të kryeministrit”, tha Bardhi./Opinion.al
