Me kërkesë të partive të opozitës, PD-LSI është ngritur Komisioni Hetimor Parlamentar për të hetuar Certifikatën e Sigurisë së ministrit të Jashtëm Gent Cakaj.
Mësohet se Komisioni Hetimor do të drejtohet nga deputeti i Partisë Demokratike Enkelejd Alibeaj, si dhe anëtarë nga PD janë Ervin Salianji dhe Xhemal Gjunkshi. Anëtarë të Komisionit nga Partia Socialiste janë caktuar Ermonela Felaj, Xhemal Qefalia, Alket Hyseni, Spartak Braho dhe Klotilda Bushka.
Çështjet që do të hetohen nga Komisioni janë: verifikimi i ligjshmërisë në pajisjen e Cakajt me “certifikatë sigurie” nga DSIK; roli i Këshillit të Ministrave, Kryeministrit në shkeljen e procedurave; arsyet e moszbatimit të ligjit nga Gent Cakaj për mbi 7 muaj dhe autoritetet përgjegjëse që kanë lejuar Cakajn të administrojë pa qenë më parë i pajisur me “certifikatë sigurie”.
Kujtojmë se ishte Presidenti Meta që në letrën drejtuar Ramës për mosdekertimin e Cakajt, theksoi se Certifikata e Sigurisë është marrë në shkelje të procedurave ligjore. Më tej, Rama bëri hapin e radhës, duke e marrë vetë detyrën e Ministrit të Jashtëm. Vetëm një ditë pasi u dekretua nga Meta, Rama ia kaloi kompetencat z.Cakaj. /Ri-De
