Zbardhet ngjarja e ndodhur në fshatin Shalës Cërrik, ku u gjet i vdekur në banesë shtetasi B.Sh. 56 – vjeç.
Policia ka zbuluar autorët që bënë inskenimin e versionit të ngjarjes që të dukej si aksidentale.
Gjithashtu policia ka arrestuar 2 shtetas të dyshuar si autorët e vrasjes dhe të inskenimit të versionit të ngjarjes. Në cilësinë e provës materiale janë sekuestruar sendet e vjedhura të fshehura në një ullishte.
Specialistët për Krimet e Rënda, në bashkëpunim me Prokurorinë e Rrethit Gjyqësor Elbasan dhe Institutin e Mjekësisë Ligjore Tiranë, bënë dokumentimin e plotë të ngjarjes së ndodhur në fshatin Shalës Cërrik, ku u gjet i vdekur në banesë 56 – vjeçari. Sipas policisë autorët e kësaj ngjarje, dyshohet të jenë shtetasit: Naim Çekrezi, 56 – vjeç dhe Ilir Çekrezi, 25 – vjeç , të dy banues në Cërrik.
Këta shtetas, dyshohen të kenë vrarë personin me iniciale B.Sh. gjatë momenteve të vjedhjes së banesës së tij dhe më pas kanë inskenuar vendin e ngjarjes, duke e bërë të dukej si ngjarje aksidentale. Por, pas veprimeve hetimore të mirëfillta u arrit në konkluzionin se kemi të bëjmë me një ngjarje të rëndë kriminale, pasi viktima ishte goditur me sende të forta, të cilat i kishin shkaktuar vdekjen e menjëhershme.
Gjatë veprimeve hetimore të ndjekura me metoda speciale të hetimit, rezultoi se në njërën dhomë të banesës së viktimës, autorët kishin vjedhur një sasi prej 250.000 lekësh (të reja) dhe 1880 Euro.
Gjatë kontrollit të ushtruar në një ullishte, grupi hetimor ka gjetur dhe sekuestruar në cilësinë e provës materiale: Rrobat e përdorura në momentin e kryerjes së krimit, 2. 250.000 leke te reja, 3. 1880 Euro si dhe një aparat celular.
Materialet i kaluan Prokurorisë së Rrethit Gjyqësor Elbasan për veprime të mëtejshme për veprën penale “Vjedhja me pasojë vdekjen, kryer në bashkëpunim.
