Një amerikan ka vdekur në çdo 44 sekonda gjatë muajit Prill për shkak të koronavirusit. Është kjo llogaria që bën CNN. Ndërkohë numri i viktimave në Shtetet e Bashkuara të Amerikës në 24 orët e fundit ka shënuar 1.435 persona. Janë këto të dhënat që dalin nga “Johns Hopkins University”, që thotë se numri i rasteve në SHBA ka arritur në 1,13 milionë dhe numri i viktimave në 66.368, ku shteti më i goditur mbetet ai i Nju Jorkut. Njëkohësisht “Johns Hopkins”, ka llogaritur se numri i personave të prekur nga COVID në botë ka arritur në 3,5 milionë dhe numri i viktimave më 250.000.
Ndërsa shifrat po shënojnë rënie në disa nga vendet e Bashkimit Europian, është Rusia ajo që me 10.600 infektime të reja ka arritur një rekord të ri të numrit të rasteve brenda 24 orëve. Sipas autoriteteve në të gjithë vendin numërohen 134.687 persona të infektuar. Rusia është për momentin vendi me regjistrimin e infektimeve të reja më të larta në Europë. Megjithatë niveli i vdekshmërisë është më i ulët krahasuar me vende si Italia, Spanja apo SHBA. 58 persona kanë vdekur në 24 orët e fundit në Rusi, duke e çuar bilancin e viktimave në 1.280. /Opinion.al
