Klose do t’i japë lam tumirën Lacios dhe me shumë gjasë edhe futbollit europian. Kjo për shkak se mediat e ndryshme raportojnë se gjermani është pranë nënshkrimit të kontratës me Nju Jork Redbulls. Një nga njerëzit që e ka njohur që në momentin e parë kur është afruar te Lacio, është Lorik Cana, i cili ka shpjeguar marrëdhënien e tij me sulmuesin gjerman te bardhekaltrit.
“Unë kam ardhur te Lacio së bashku me Klosen. Kemi qenë me fat që e kemi pasur në ekip. Është një privilegj për Lacion që ka pasur shërbimet e tij dhe gjithashtu për mua, që kam luajtur me të, pasi fama e tij është ndërkombëtare”, ka deklaruar Cana. Kapiteni i Shqipërisë ka vijuar me elozhet e tij për sulmuesin që ka mbyllur aventurën e tij me bardhekaltrit.
“Një shembull i profesionalizmit, ka shënuar shumë gola dhe profili i tij është i padiskutueshëm. Për një klub si Lacio ishte një lojtar mjaft i mirë dhe jo vetëm në fushë. Me profesionalizmin dhe mentalitetin e tij, gjithashtu ndikonte pozitivisht te shokët e skuadrës”, është shprehur Lorik Cana. Për Lorikun, edhe kur ishte pjesë e formacionit titullar të Lacios, shpesh i duhej që të përballej kundër Kloses në seancat stërvitore, te të cilat gjermani gjithashtu kishte ego të madhe.
“Kam pasur fatin të njihem me të edhe njerëzisht, jo vetëm në fushë. Ai është i jashtëzakonshëm, është një kampion dhe gjithmonë pikë referimi për të fituar. Klose gjithmonë ka kërkuar të fitojë, edhe në ndeshjen e kontrollit që zhvillonim të enjteve”, ka vijuar tregimin e tij kapiteni i Shqipërisë.
Në deklaratën e tij, mbrojtësi shqiptar flet edhe për miqësinë me Klosen, ndërkohë që i atribuon atij edhe cilësi të mira si shembull për t’u ndjekur:
“Klose ishte shumë i përpiktë në jetën e tij të përditshme dhe gjithçka e bënte duke menduar mënyrën më të mirë për të ruajtur gjendjen fizike. Ai ka qenë gjithmonë një pikë referimi për të rinjtë. I këshillonte ata, madje edhe për detajet si të ushqeheshin”.
E ardhmja
Lorik Cana është përfolur shumë se mund të mbyllë karrierën e tij në futbollin europian, për të nisur një aventurë përtej oqeanit, ku futbolli nuk është kaq impenjativ. Kur Klose është përfolur për një tratativë thuajse drejt realizimit me nju Jork Redbulls, Cana ka dhënë një detaj për të ardhmen e tij. “Të dielën (sot) do ta përshëndesë Lacio, sepse ai e meriton një kornizë të madhe të këtij klubi. Do të doja të luaja edhe një vit me Klosen. Kush e di, ndoshta vitin e ardhshëm mund të jemi në një klub, së bashku”, përfundoi Cana.
