Sekretari i Jashtëm i Britanisë së Madhe, David Cameron, i ka premtuar Ukrainës ndihmë vjetore ushtarake “sa të jetë e nevojshme”.
Gjatë një vizite në Kiev, ai theksoi po ashtu se Britania nuk është kundër që Ukraina t’i përdorë armët britanike për sulme brenda Rusisë: “Ne do t’i japim 3,7 miliardë $ çdo vit sa të jetë e nevojshme. Ne sapo kemi dhënë gjithçka që kemi sa i përket pajisjeve”.
“Disa prej tyre (pajisjeve) janë duke mbërritur në Ukrainë sot, derisa unë po qëndroj këtu”, shtoi ai.
Cameron tha gjithashtu se Ukraina ka të drejtë t’i përdorë armët që ia jep Londra për t’i goditur kufijtë brenda Rusisë dhe se i takon Kievit të vendosë nëse dëshiron ta bëjë një gjë të tillë: “Ukraina e gëzon atë të drejtë. Sikurse Rusia që po sulmon brenda Ukrainës, mund ta kuptoni lehtë pse Ukraina e ndjen nevojën për t’u siguruar se po e mbron veten”.
Cameron, i cili e udhëhoqi Britaninë e Madhe nga viti 2010 deri në vitin 2016 si kryeministër dhe u rikthye në frontin e politikës pak muaj më parë, u takua me ministrin e Jashtëm të Ukrainës, Dmytro Kuleba, dhe me presidentin ukrainas Volodymyr Zelensky, gjatë vizitës së tij të dytë në Kiev i Sekretar i Jashtëm.
Ai e përshëndeti miratimin e paketës së shumëpritur të ndihmës ushtarake amerikane për Ukrainën në vlerë 60 miliardë dollarë: “Kjo është tejet e rëndësishme, jo vetëm për shkak të armëve që do t’i sjellë, por edhe për shkak se do ta rrisë moralin e popullit këtu në Ukrainë”.
