Këshilli i Lartë i Prokurorisë (KLP) ka caktuar datën 11 dhjetor të këtij viti, ora 09.00, për të zhvilluar intervistat me kandidatët për drejtues të SPAK. Intervistat do të bëhen sipas rendit alfabetik, si dhe do të vijojë me zgjedhjen e Drejtuesit të Prokurorisë së Posaçme kundër
Korrupsionit dhe Krimit të Organizuar (SPAK).
Prokurorët Doloresa Musabelliu, Adnan Xholi, Klodian Braho dhe Elvin Gokaj janë katër kandidatët zyratrë që janë kualifkuar nga KLP në garën për drejtuesin e ri të SPAK.
Sipas KLP, prokurorët e SPAK, Adnan Xholi, Klodian Braho, Doloreza Musabelliu dhe Elvin Gokaj i plotësojnë kushtet për të drejtuar Prokurorinë e Posaçme dhe emrat e tyre u kualifikuan për të vijuar më tej garën.
Miratimi i listës me 4 kandidatët në KLP është bërë me 10 vota pro. Në votim nuk mori pjesë vetëm anëtari Zeqir Hodaj. Hodaj u largua pak para votimit pasi sipas tij ka pasur shkrime në media se ai ndodhet në situatën e konfliktit të interesit sepse i biri është emëruar në BKH, nga një prej kandidatëve, Klodian Braho.
4 kandidatët pasi kaluan këtë fazë do të ftohen për t’u intervistuar nga KLP. Ata pritet t’i nënshtrohen një procesi të hapur përmes intervistave publike dhe vlerësimeve nga KLP, ku do të merret parasysh përvoja e tyre profesionale, integriteti, vizioni dhe aftësia për të drejtuar një nga institucionet më të rëndësishme të drejtësisë në vend në 35 vite demokraci.
Kujtojmë që më 18 dhjetor, drejtuesit aktual të SPAK Altin Dumanit i mbaron mandati 3-vjeçar i drejtimit të Prokurorisë së Posaçme.
