Kreu i Agjencisë Kombëtare të Mbrojtjes Civile, Haki Çako ndodhet në qarkun e Beratit ku janë regjistruar disa vatra zjarri.
Për “News24” ai ka ka deklaruar se ka qenë e vështirë vënia nën kontroll e flakëve në fshatin Velabisht. Po ashtu, nën kontroll janë vënë dhe vatrat e tjera të zjarri në këtë qark.
Çako nuk i ka kursyer kritikat për kryebashkiakët për të cilët thotë se nuk kanë marrë masa për përballimin e vatrave të zjarrit.
Madje ai shkon më tej, duke u shprehur se është i indinjuar ndaj kryetarit të bashkisë së Beratit, Ervin Demo, për të cilin tha se “nuk hap telefonin, ndërkohë që i digjet gjysma e territorit” të qytetit.
“Situata ka qenë jashtëzakonisht e vështirë dhe ka qenë një 24-orësh i vështirë për gjithë strukturat. Jemi në fshatin Velabisht të Beratit, së bashku me drejtorin e policisë dhe zjarri është vendosur nën kontroll pas punës intensive të pilotëve dhe helikopterit Cougar që nuk ka reshtur punën.
Ka pasur një rrezik të shtuar në fshatin Starovë me forcat përkatëse që ishin përgatitur edhe për evakuimin e banorëve, por fatmirësisht nuk ka pasur nevojë për shkak të shuarjes së flakëve. Kjo verë ka qenë kryesisht pozitive falë punës së njerëzve dhe angazhimit të gjithë strukturave. Nuk kanë munguar as zjarret masive që kanë shkaktuar dëme.
Nuk mund të pranojë se si një kryetari bashkie i digjet gjysma e territorit dhe ai nuk hap telefonin. Ka kryetarë bashkie që kanë qindra punonjës nën varësi dhe nuk organizojnë strukturat. Jo vetëm në këtë operacion, por edhe në operacione të tjera. Kryetarët e bashkive nuk kanë qenë në nivelin e duhur, edhe pse jo të gjithë. Këtë e përcjell sepse më indinjon sepse kërkojnë direkt njerëz dhe helikopterin, kur nuk angazhohen”, u shpreh ai.
