Së shpejti qarkullimi i automjeteve do të jetë i mundur në të dyja korsitë e Bypaasit të Fierit duke lehtësuar trafikun për arterien e jugut të vendit. Lajmi bëhet i ditur nga Ministrja e Infrastrukturës Belinda Balluku, sipas të cilës puna po ecën sipas grafikut të përcaktuar për ta mbyllur atë pa filluar ende shirat dhe dimri.
“Ne arritëm në këtë segment diçka shumë të rëndësishme, që ishte dorëzimi dhe hapja e karrexhatës së majtë për sezonin veror. Kjo është një gjë për të cilën unë ju kam përgëzuar, kryeministri gjithashtu dhe padyshim shpresojmë që ju ta mbani premtimin dhe në karrexhatën e djathtë. Çfarë duhet është që të përshpejtojmë ritmet. Këtu po punohet me ritme shumë të mira por për shkak se jemi në shtator dhe po vjen dimri pastaj gjërat nuk do jenë më në dorën tuaj apo tonën përsa i përket motit”, deklaroi ministrja gjatë inspektimit të punimeve.
“Aktualisht jemi duke asfaltuar në korsinë e dytë, plotësisht brenda skedulit të punimeve. Ndërkohë kemi filluar dhe vendosjen e gominave në shtatë mbikalimet dhe brenda tetorit do t’i hedhim të gjithë trarët te mbikalimet. Jemi plotësisht në rregull me grafikët. Kuptohet, në nëntor ne kemi për të përfunduar këtë korsi, në nivelin që është. Është një premtim që ne e kemi dhënë para njerëzve këtë gjë dhe pa diskutim do ta bëjmë”, bëri të ditur inxhinieri i punimeve./ Opinion.al
