Ishte sot seanca gjyqësore ndaj Ferdinand Rukos, 52-vjeçarit që i mori jetën bashkëshortes, Liljanës, duke e hedhur nga dritarja e arpartamentit ku banonin në Fier. Gjykata e Krimeve të Rënda pranoi kërkesën e avokatit të tij për gjykim të shkurtuar. Me pranimin e akteve të prokurorisë, Ruko i shpëton dënimit maksimal.
Para gjykatës, i pandehuri Ruko pranoi krimin duke kërkuar aplikimin e gjykimit të shkurtuar, kërkesë të cilën ia mbështeti edhe avokati mbrojtës me arsyetimin ligjor.
Edhe prokuroria nuk ishte kundër, çka i lehtësoi gjykatës vendimmarrjen, duke pranuar kërkesën e të pandehurit që akuzohet për “vrasjen e bashkëshortes”.
Pas pranimit të gjykimit të shkurtuar, seance u shty për t’i lënë kohë prokurorit të përgatisë konkluzionet përfundimtare.
Ngjarja për të cilën akuzohet Ruko ka ndodhur në dhjetorin e vitit të kaluar, ku pas një debate me bashkëshorten Liljana Ruko e ka hedhur atë nga dritarja e banesës së tyre në lagjen “Kryengritja” të Fierit, ku për pasoj ka gjetur vdekjen e menjëhershme.
Dy fëmijë të mitur të familjes Ruko kanë mbetur jetim dhe kujdestaria i është lënë dajës së tyre, vëllait të Liljanës së ndjerë.
