Agron Sinani, 35 vjeç, i dënuar me gjashtë vjet burg, është shpërblyer me leje nga autoritetet e Burgut të Sigurisë së Lartë Burrel, por dje nuk është rikthyer në vendin e vuajtjes së dënimit.
Kjo ka shqetësuar drejtuesit e këtij institucioni, të cilët kanë lajmëruar jo vetëm Drejtorinë e Përgjithshme të Burgjeve për ngjarjen e ndodhur, por edhe pikat kufitare dhe komisariatet e policisë.
Burime pranë Burgut të Burrelit saktësuan se leja për të dënuarin Agron Sinani është dhënë brenda kritereve ligjore.
“Këtu në burg është ngritur dhe funksionon një komision, i përbërë nga pesë veta, i cili shqyrton rast pas rasti kërkesat për leje të të dënuarve. Agron Sinani është shpërblyer një javë më parë nga ky komision me shtatë ditë leje.
Çdo gjë është kryer brenda të gjitha rregullave dhe kritereve të paracaktuara. Ai u shpreh me shkrim se kishte një të afërmin e tij në gjendje të rëndë shëndetësore”, bënë me dije zyrtarë të këtij burgu.
Mesditën e djeshme Sinani duhej të kthehej në vendin e vuajtjes së dënimit.
Mosrespektimi i lejes së dhënë ka bërë që drejtuesit e Burgut të Burrelit të reagojnë dhe të kërkojnë ndërhyrjen e strukturave shtetërore për gjetjen dhe kthimin e tij në qeli.
Fillimisht janë njoftuar zyrtarët e lartë të Drejtorisë së Burgjeve dhe pastaj edhe komisariatet Kukës, Tiranë e Mat, si dhe pikat doganore në të gjithë vendin. Sinani është dënuar nga gjykata me gjashtë vjet heqje lirie.
Ai kishte vuajtur tri vite dhe duhej të vuante dhe tri vite të tjera. 35 vjeçari është dënuar për veprat penale të “rekrutimit dhe detyrimit të femrave për ushtrim prostitucioni” dhe “trafikim të të miturve”.
Në verën e vitit 2010, ai së bashku me dy persona të tjerë kanë mbajtur të izoluara në Linëz tri vajza, 15, 18 dhe 19 vjeçe, dhe kanë tentuar t’i trafikojnë në Kosovë.
Ky shtetas ka rezultuar i dënuar më parë me gjashtë muaj burg për “dezertim nga shërbimi i detyrueshëm”. /Panorama.al
