Rastet e bullizmit dhe të ngacmimeve janë në rritje. Psikologët ngrenë shqetësimin se shpesh herë sinjalet identifikuese që lëshojnë fëmijët të cilët vuajnë nga një formë bullizmi nuk kapen në kohë, si nga prindërit, por edhe nga strukturat e shërbimit social dhe mësuesit në shkolla.
“Nga 12, le të themi në 16-17, bullizohen kryesisht disa natyra, pra ata që janë pak më të ndrojtur, pak më të mbyllur, pak në punën e vetë. Bullizohen ata që janë nxënës shumë të mirë, ku shumica e klasës i pikas, i spikat, domethënë ua spikat si handikap më shumë. Bullizohen ata që nga pikëpamja e të mirave materiale janë më të dobët”, shprehet Entela Binjaku.
Për psikologen Entela Binjaku, parësore për të kapërcyer këtë shqetësim është komunikimi me fëmijët, qoftë viktimin qoftë dhunuesin.
“Edhe njëherë, prindërit pa mësuar vetë me këtë realitet. Realiteti i fëmijërisë së tyre është shumë i ndryshëm nga ky i fëmijëve të vetë prindërve dhe si të tillë janë tërësisht, në mos në njohje të plotë, pra të pasojave ose siç shfaqen simptomave të presionit që ka dhuna mbi fëmijën e tyre”, tha Binjaku.
Bullizimi sipas psikologes është i pranishëm në çdo shkollë, dhe mund të prek çdo fëmijë, ndaj duhet një ndërgjegjësim shumë i madh i strukturave.
“Veçanërisht mosha në hyrje të adoleshencës karakterizohet nga dëshira për të mëvetësi, për tu mbyllur, për të qëndruar me veten, për të bërë atë që ti dëshiron. Është simptomë e kësaj moshe, pra bindja që të tjerët s’të kuptojnë se je i pakuptuar dhe kur prindërit nuk janë aty që ti diskutojnë, kur mësuesit nuk bëjnë atë detyrë që kanë, kur psikologët nuk manifestojnë atë prezencën, në radhë të dytë të dijes, profesionalizëm, është e vështirë që një fëmijë të dalë vetë”, tha Binjaku.
Bullizmi veç fizikisht në ambientet e shkollave është i përhapur edhe online. Gjatë 2024 janë bërë 407 denoncime pranë platformës iSIGURT.al, dhe 40% e raportimeve janë për bullizëm dhe gjuhën e urrejtjes.
Vajzat janë më të prekura nga ky fenomen, pasi 62% e rasteve janë raportuar prej tyre.
Klan News
