Bujar Osmani, Ministri i Punëve të Jashtme të Republikës së Maqedonisë së Veriut ka deklaruar gjatë një interviste në emisionin “Opinion” se ndaj tij është tentuar një atentat.
Përballë gazetarit Blendi Fevziu, ai ka rrëfyer se kjo tentativë është kryer gjatë një vizite të tij në Transnistri, ku ndodhej si kryesues me një delegacion të OSBE.
“Në Transnistri kam qenë vitin e kaluar si kryesues i OSBE-së, madje kishte një tentim për atentat. Të nesërmen pas vizitës sime si kryesues i OSBE-së arrestohet një numër i madh i njerëzve që kishin pretenduar sulm ndaj konvoit tim, mirëpo e porositur nga Moldavia, me qëllimin për të krijuar tension brenda”, tha Osmani.
Ai shtoi se incidenti vijoi edhe gjatë fluturimit, kur avioni shtetëror me të cilin udhëtonte u zhduk nga radarët.
“Kishte një incident në avionin tim për në Shkup, ku kishte humbur nga radari dhe nga Moldavia deri në Shkup ne nuk jemi identifikuar nga asnjë radar në tokë, por kemi ndjekur koordinatat. Avioni Humbi kontaktin me të gjitha kullat e kontrollit nga Moldavia deri në Shkup dhe ne kmi vënë në dijeni edhe NATO-n”, tha Osmani duke shtuar se mbi këtë ngjarje ka nisur edhe një hetim./Opinion.al
