Karriera magjike e portierit Gianluigi Buffon ka regjistruar dje një tjetër moment të rëndësishëm. Portieri ka mbyllur dje ndeshjen e tij të 200-të në Serinë A me fanellën e Juventusit pa pësuar gol, një rekord për kampionatin italian. Bardhezinjtë fituan dje 1-0 ndaj Romës në “Juventus Stadium” dhe Buffon e mbajti të paprekur rrjetën e portës, për të 200-n herë me fanellën e kampionëve të Italisë. “Jam i kënaqur, unë bëj vetëm detyrën dhe nuk i di shifrat”, tha Bufon pas takimit, që më tej shtoi: “Për mua e rëndësishme ishte fitorja ndaj Romës, pasi na jep mundësi të shkëputemi edhe pse kampionati është ende shumë i gjatë”, tha Buffon, ndërkohë që Juventus shkon 7 pikë larg Romës në renditje.
Pas humbjes së turpshme me Genoa, skuadra kampione e Italisë ka rigjetur ekulilibrat e duhur dhe tani po ecën e sigurt. edhe vetë kapiteni i Juventus është i kënaqur me paraqitjen e skuadrës: “Pashë një skuadër me identitet, që tregoi epërsi në fushë. Fituam si skuadër, luajtëm në mënyrë solide dhe këto janë fitoret që të shpallin kampion. Por nuk jemi shpallur ende kampion. Avantazhi i krijuar na jep mundësi që të mendojmë më shumë për Champions, pasi aty duam të arrijmë diçka më shumë”, tha portieri Gigi Buffon, që ka përgëzuar edhe shokun e skuadrës Gonzalo Higuain për golin e realizuar. “Tregoi se është një kampion, por edhe Mandzukic e Dybala në sulm janë të mëdhenj”, tha portieri juventin, që shpëtoi portën nga dy gola të sigurt.
