Nga Brukseli edhe këtë të hënë është kërkuar që qeveria dhe opozita të negociojë, ndërsa vendi është futur në një krizë politike të paprecedentë. Zëdhënësja e Komisionit Evropian, Maja Kocijancic është pyetur nga gazetarët shqiptarë në Bruksel, ndërsa ka thënë se palët duhet të angazhohen në negociata. Sipas saj Parlamenti është vendi ku diskutohet.
“Ajo që mund të them është se të nënvizoj atë që eurokomisioneri Han dhe zonja Mogherini kanë thënë tashmë. Kur bëhet fjalë tek protestat ata kanë riafirmuar edhe njëherë të drejtën e qytetarëve për të protestuar të lirë por kanë denoncuar çdo retorikë politike për dhunë. Kur bëhet fjalë për dorëzimin e mandatave vendimi i opozitës dëmton funksionimin e demokracisë parlamentare, pasi parlamenti është vendi ku diskutohet dhe jo bojkotohet. Këto vendime janë jo produktive dhe shkojnë në kundër vendime që qytet kanë marrë me votë, dhe kundër aspiratës për anëtarësimin në BE të Shqipërisë. Të gjithë anëtarët e parlamentit duhet të vijojnë të shërbejnë në parlament dhe të evitojnë aktet e dhunës në këtë drejtim qëndrimi i Brukselit është ai i deklaruar edhe më herët. Opozita dhe qeveria duhet të angazhohen në negociata për të mirën e vendit, kjo është një deklarata që është bërë një javë më parë dhe që vazhdon të mbetet në fuqi‘.
E pyetur nëse është e rëndësishme thjesht përfundimi i reformës në drejtësi dhe jo cilësia e saj, zëdhënësja e KE-së u shpreh:
“Më lejo që të nënvizoj se ka vëzhgues ndërkombëtar që monitorojnë nga afër ecurinë e reformës në drejtësi. Veçanërisht për të garantuar cilësinë e procesit. Në pikëpamjen tonë, nuk ka asnjë indikatorë që tregon se procesi i vettingut do të sakrifikohet, vetëm për të përfunduar reformën. Qëllimi i saj është rikthimi i besimit të publikut tek drejtësia. Që prej nisjes së procesit, vettingu ka sjellë fakte konkrete bazuar edhe tek investigimi konkret si edhe në kuadër të procesit kontrollo dhe balanco, rezultatet e të cilit do të publikohen në raportin e Komisionit Europian në muajin mars. Ne synojmë që procesi të jetë i drejtë dhe të kontribuojë në luftën kundër korrupsionit, veçanërisht tek në sistemin gjyqësor”.
Ndërkohë Kryetari i Partisë Demokratike, Lulzim Basha ka mbledhur këtë të hënë aleatët në një takim në selinë blu, për të koordinuar aksionin opozitar, i cili siç është paralajmëruar do të zhvillohet përmes protestave çdo të enjte para Kuvendit të Shqipërisë./G.F Opinion.al
