Naxhim Lashraui është personi që ndërtoi bombat që u përdoren në sulmet kamikaze të së martës në aeroportin dhe metronë e Brukselit.
I quajtur si “Burri me të bardha”, ai është aktualisht njeriu më i kërkuar në Europë. Kujtojmë se më herët, mediat belge dhe më pas gjithë të tjerat raportuan për arrestimin e tij, por prokuroria e mohoi.
Gjatë një konference, Prokurori Federal i Belgjikës, Frederic Van Lwv dha detaje se si ndodhën shpërthimet dhe bëri për herë të parë publik bilancin zyrtar të shpërthimeve; 31 të vdekur dhe 270 të plagosur. Një tjetër trup i pajete u gjet 1 orë pas konferencës së tij për shtyp, duke e çuar në 32 numrin e viktimave dhe bilanci fatkeqësisht, pritet të përkeqësohet.
Van Lwv tha se në Aeroportin e Zaventemit vepruan dy kamikazë, njëri prej të cilëve u identifikua përmes gjurmëve të gishtërinjve. Ai është Brahim El Bakraui, ky në qendër të kësaj fotografie. Tjetri, në të majtë, nuk është identifikuar ende.
Ndërsa vëllai i Brahim El Bakraui, Kalidi, është identifikuar si kamikazi i shpërthimit në metronë e Malbekut.
Prokurori Federal tha se Brahim El Bakraui kishte lënë një testament, i gjetur në lidhur me një detonator, një kosh mbeturinash pranë shtëpisë ku jetonte. Shkruante se ishte në gjendje të vështirë psikologjik, pasi kërkohej ngado dhe se nuk donte të përfundonte në një qeli ngjitur me Salah Abdeslam.
Në apartamentin ku ishin strehuar dy vëllezërit u gjetën 15 kilogramë eksploziv, 150 litra aceton 5 litra ujë i oksigjenuar, detonatorë dhe një valixhe me gozhdë.
Vëllezërit El Bakraui, 8 ditë para sulmeve kamikaze, kishin shkëmbyer zjarr me policinë dhe kishin mundur të shpëtonin.
Autoritetet kanë ndaluar një të dyshuar tjetër për sulmet dhe po vazhdojnë kërkimet intensive për burrin me të bardha, i cili është i aftë të përgatisë bomba të tjera të fuqishme, si ato të përdorura në Paris e Bruksel. /Tv Klan
