Pas reagimit të Armando Brojës, trajneri i Kombëtares Shqiptare Sylvinho ka komentuar lajmet që qarkullojnë në media për një krisje në raportin mes të dyve.
Në konferencën për shtyp, Sylvinho i konsideroi lajme të rreme pretendimet dhe tha se shkak i mosaktivizimit të Brojës me Kombëtaren ka qenë dëmtimi i tij.
Ai ka thënë se e respekton si lojëtar dhe gjithashtu duhet respektuar edhe shëndeti i tij.
Sylvinho thekson se e mirëpresin të luajë sapo të jetë rikuperuar.
“Kam parë postimin që ka bërë dhe u ndjeva shumë mirë. E kam dëgjuar që flitet për Brojën mbi fake news që qarkullon, por janë gjëra që nuk ekzistojnë. E respektoj shumë si lojtar por duhet të respektojmë edhe shëndetin e tij. Herën e fundit kur erdhi me Kombëtaren u stërvit shumë pak. Kur dolëm në konferencë u detyrova të thoja që ai nuk është në gjendje. S’ka bërë një ndeshje 90 minuta. Që kur u kthye pas ndeshjes me Çekinë, thuajse nuk ka luajtur fare. Sigurisht që ka nevojë të rikuperohet. Ne e mirëpresim kur ai të kthehet, kur të jetë në formë”, u shpreh Sylvinho.
