Sekretari i Jashtëm i Britanisë së Madhe, Phillip Hammond tha se Rusia paraqet rrezik për gjithë skenën botërore, për shkak të mosrespektimit të normave ndërkombëtare.
Duke folur në një konferencë për media në kryeqytetin e Gjeorgjisë, Tbilisi, Hammond tha: “Rusia injoron normat e sjelljes ndërkombëtare dhe thyen rregullat e sistemit ndërkombëtar. Kjo paraqet një sfidë dhe kërcënim për të gjithë ne”, ka thënë ai.
Hammond i dha këto komente pasi u pyet nga gazetarët nëse Rusia përbën ende kërcënim për vendet e rajonit, si Gjeorgjia dhe shtetet baltike.
Gjeorgjia zhvilloi një luftë të shkurtë me Rusinë në vitin 2008.
Hammond i bëri thirrje Moskës që të luajë një rol më konstruktiv në skenën botërore dhe t’i “ndjekë rregullat e sistemit ndërkombëtar.”/REL
