Një infermiere 32-vjeçare akuzohet për vrasjen e pesë foshnjave djem dhe dy vajzave si dhe për tentativën për të vrarë 10 foshnja të tjera në spitalin “Countess of Chester” në Britaninë e Madhe. Sipas BBC 32-vjeçarja dyshohet se ka përdorur insulinë si mjet për të helmuar foshnjat.
Lucy Letby nga Hereford, ka mohuar 22 akuza të ngritura ndaj saj në Gjykatën e Kurorës së Mançesterit. Anëtarët e familjes së disa prej foshnjave të përfshira në këtë çështje ishin midis të pranishmëve në gjykatë teksa prokurori hapi seancën. Prokurori tha se “ndryshe nga shumë spitale të tjera, brenda njësisë neonatale në Spitalin Kontesha e Chester, një person po helmonte foshnjat”. Sipas tij kjo u vu re pasi para janarit 2015, statistikat për vdekshmërinë e foshnjave në njësinë neonatale në Konteshën e Chester ishin të krahasueshme me spitale të tjera të ngjashme.
Më pas gjatë 18 muajve të ardhshëm apo më shumë, pati një rritje të konsiderueshme të numrit të foshnjave që po vdisnin dhe të numrit të atyre që po pësonin kolaps.
Ai tha se rritjet e numrit të vdekjeve u vunë re nga konsulentët e spitaleve, të cilët ishin të shqetësuar se “foshnjat që po vdisnin ishin përkeqësuar në mënyrë të papritur”.
Më tej prokurori tha se meqenëse mjekët nuk mund të shpjegonin kolapset dhe vdekjet, atëherë thirrën policinë për të kryer një shqyrtim. Hetimi sugjeroi se në periudhën ndërmjet mesit të vitit 2015 dhe mesit të vitit 2016, dikush në njësinë neonatale helmoi dy fëmijë me insulinë.
Ata ishin 2 binjakë që rrezikuan jetën pak ditë pas lindjes. Mjekët panë se niveli i tyre i sheqerit në gjak ra në menjëherë në nivele të rrezikshme. Por foshnjat të identifikuara vetëm si fëmija F dhe fëmija L mbijetuan vetëm për shkak të aftësive të stafit mjekësor që menduan se sheqeri i ulët në gjak mund të kishte shkaqe natyrale. Ajo që stafi mjekësor nuk e kuptoi ishte se në të dyja rastet, shkak ishte rezultat i helmimit me insulinë.
Prokurori tha se askush nuk mendonte se dikush do të përpiqej të vriste foshnjat në një njësi neonatale. Gjykatës iu tregua një tabelë që tregonte infermierët që ishin të pranishëm në detyrë kur kishin ndodhur incidentet kriminale.
Duke vënë në dukje, si shembuj, tre veprat e para të supozuara me kohë, ai tha se grafiku tregonte se i vetmi person që ishte i pranishëm në të tri rastet ishte e pandehura.
“Shumë nga ngjarjet në këtë rast kanë ndodhur në turnin e natës. Kur Lucy Letby kaloi në turne ditore, kolapset dhe vdekjet kaluan në ditën. Të gjitha ishin vepër e gruas në bankën e të akuzuarve.”-tha Prokurori.
Jurisë i është thënë se gjyqi mund të zgjasë deri në gjashtë muaj.
