Në nisje të protestës opozitare, deputetja Majlinda Bregu nuk ishte e pranishme për shkak të një vizite disa ditore në SHBA, e megjithatë ajo thotë se në shesh ishte një protestues më pak por një avokate më shumë.
E përfolur shumë si një ndër aleatet e përzgjedhura nga kryeministri Rama për ti ofruar asaj një pozicion të ri në procesin e negociatave, Shqipëri-BE, Bregu ka mohuar një gjë të tillë në “E Diell” të Adi Krastës.
Duke folur për marrëdhënien e saj me Ramën, ish-ministrja e Integrimit tha se nuk ka patur as në mënyrë private as në mënyrë zyrtare, sigurisht, asnjë ofertë dhe asnjë propozim nga qeveria aktuale.
“Jam e bindur se mjeshtërinë e njohur tashmë të pjesës së hedhjes pak helm të kundërshtarit politik dhe këtë pjesë Rama e përdor shumë mirë, nganjëherë janë më të gatshëm që nëpërmjet shprehjes së vlerësimeve të tentojnë të të bëjnë më shumë dëm dhe në një ambient shqiptar kjo gjë s’është se nuk zë vend..”
Megjithatë ajo shprehet e vendosur se do të vazhdoj të mbrojë çështjen e integrimut eurpian të Shqipëris, që sipas saj, kalon përtej animozitetit tonë politik, kalon përtej atij debati të përditshëm politikë që ne kemi, sepse është një çështje dhe një aspiratë që shqiptarët ja kanë vendosur detyrë politikës shqiptare.
E pyetur në intervisën me Adi Krastës për lëvdatat që kryeministri i ka bërë publikisht, madje edhe në prani të të huajve, Bregu përgjigjet: Nëse thotë ato që beson bën shumë mirë në fakt.
“Unë nuk e shoh veten as mendje mbyllur e as një nga njerëzit më pak të aftë të këtij vendi. Ky është një proces i një vetëvlerësimi që njeriu duhet ta bëjë për veten. Por të jesh i sigurt se nuk do t’i jap kënaqësinë asnjë ndërkombëtari përpara nesh që të na shoh me shpata apo me shkopinj nën duar vetëm për të treguar se sa të zotë jemi për të ruajtur gjithsecili sinorin e tij ne politikë” thotë deputetja demokrate.
Edhe përsa i përket qëndrimit të eurodeputetit gjerman, Knut Fleckenstein ndaj protestës së opozitës, Bregu tha se ai është një mik i Shqipërisë dhe i Shqipëtarëve.
Ajo tregoi se si ai e ka ndihmuar opozitën për dekriminalizimin dhe ka mbështetur kauzën e Bashës dy vjet më parë.
