Zëvendëskryeministri Erion Braçe ka prezantuar Artan Lamen si drejtor të Agjencisë Shtetërore të Kadastrës. Ky institucion i ri është krijuar nga bashkimi i Hipotekave me ALUIZNI-n dhe synon të zgjidhë problemet e pronësisë.
Braçe tha se certifikimi i pronave është prioritet i qeverisë, duke shtuar se beteja për procesin e legalizimeve të objekteve të paligjshme do të vijojë. Ai tha se procesin do ta ndjekë vetë, ndërsa paralajmëroi se do të goditen ashpër të gjitha rastet korruptive.
“Ky proces nuk do të ketë sukses nëse nuk do të ketë bashkëpunim me gjithë aktorët. Bëj një apel, besoj që duhet ta kenë në vëmendje, bashkitë kanë marrë atribute të qenësishme, edhe për legalizimin dhe certifikimin e titujve të pronësisë, janë bashkitë që duhet të çojnë procesin përpara, të jenë të interesuara që procesi të përfundojë sa më parë të jetë e mundur. Dua të bëj apel edhe për agjencitë e tjera, apel edhe banorëve, kërkoni shërbim, mos paguani asgjë që nesër mund tu kthehet në të kundërt, vepër penale edhe për nëpunësit edhe për ata që mendon se mund ta blejë shërbimin mes parave, do ta luftojmë korrupsionin”, u shpreh Erion Braçe.
Nga ana tjetër, Artan Lame foli edhe për tre shtyllat e kësaj reforme.
“Reforma do të jetë në tre drejtime: Reformë thelbësore në hartografi, reformë thelbësore në shërbime dhe sistemet e shërbimit dhe reformë thelbësore në burimet njerëzore, në meritokraci”, u shpreh Lame./Opinion.al
