Lidhur me pretendimet e opozitës sa i takon zgjedhjeve të 11 Majit, të cilat i konsideron një “farsë”, ka komentuar në Parlament edhe deputeti i Partisë Socialiste Erion Braçe.
Sipas tij zgjedhjet e vjedhura janë ato të vitit 1996, dhe se Partia Demokratike e ka bërë këtë gjë në gjithë historinë 35-vjeçare të vendit.
Gjatë fjalës së tij, ai u ndal edhe tek shfrytëzimi i burimeve ekonomike të cilat ai theksoi se janë tejkaluar me disa për qind.
“Unë dua të them dy fjalë për zgjedhjet. Nëse ka zgjedhje të vjedhura nga A te Zh-ja, por që të vjedhura ama… Nëse ka një parti që i ka bërë të gjitha këto, është PD-ja e ’96-s. Këtu në këtë sallë kishte 156 deputetë dhe vetëm 9 deputetë të opozitës. Ka pasur një parti që e ka bërë këtë gjë në gjithë historinë 35-vjeçare të vendit. Në këto zgjedhje të flasësh për shfrytëzim të burimeve ekonomike, patjetër që mua më bën shumë përshtypje. Mjafton të shikosh sesi plani i taksave është tejkaluar me disa për qind; pra, njerëzve u janë grumbulluar paratë. Suficiti është më i lartë se ç’ka ndodhur ndonjëherë. Shpenzimet janë tkurrur, ndërkohë që njerëzve u janë mbledhur tatime dhe taksa, pavarësisht zgjedhjeve”, tha Braçe.
