Nuk ka alkool për tifozët që duan të ndjekin ndeshjen mes Botev dhe Partizanit në stadiumin e qytetit të Burgas. Vendimi është marrë nga polica e këtij qyteti, e cila ka saktësuar se do të krijojë një rreth “pa alkool” për të evituar trazira para, pas apo gjatë ndeshjes nga ultrasit e Botev të cilët njihen si problematikë Me urdhër të bashkisë së qytetit të Burgas, është vendosur që të mos tregtohet alkool në një distancë deri në 500 metra nga stadiumi ku zhvillohet ndeshja. Kjo do të thotë se kushdo që dëshiron të konsumojë alkool, duhet ta bëjë një gjë të tillë jashtë këtij rrethi nga ora 12:00, deri në orën 24:00 të ditës së nesërme.
Por tifozët bullgarë duhet të kenë kujdes mos e teprojnë me pijen edhe jashtë kësaj zone. Personat të cilët policia do t’i cilësojë nën efektin e alkoolit, nuk do të lejohen të hyjnë në impiant për të ndjekur ndeshjen.
Ndërkaq, në zonën përreth stadiumit nuk do të lejohet as përdorimi i dronëve dhe as hedhje të organizuara me parashuta, siç ndodh në disa raste në evenimente të tilla futbollistike me qëllim marketingu apo fotografim nga lartësia. Njëkohësisht, përveç ndalimit të fishekzjarrëve apo mjeteve të ngjashme, policia ka vendosur të mos lejojë as shishet me ujë në stadium, me apo pa tapë. Të gjithë tifozëve do t’u shërbehet ujë në ambientet e brendshme të stadiumit… vetëm me gota plastike./Panorama Sport
