Gjendja shëndetësore e Matteo Messina Denaro është përkeqësuar. Ish-kreu i organizatës mafioze Cosa Nostra po vuan dënimin në regjimin 41 bis në superburgun e L’Aquila.
Mediat italiane shkruajnë se ai vuan nga një tumor dhe se prej ditës së arrestimit ndodhet nën kurim në burg, ku i është ngritur një dhomë kimioterapie .
Mësohet se avokati i tij është shprehur se, “duhet shtrimi i tij në spital”. Javët e fundit Messina Denaro i ishte nënshtruar një operacioni të vogël për probleme urologjike, por u kthye në burg gjatë ditës.
“Tani Messina Denaro nuk ha më, ai gjithashtu ka vështirësi për të pirë, ka nevojë për shtrim urgjent në spital, sepse i duhet një serum për t’u ushqyer. Situata e tij nuk është më e menaxhueshme nga struktura në të cilën ai është i burgosur nën regjimin 41bis”, tha avokati mbrojtës Alessandro Cerella.
